EMPREGO
O obradoiro Labor@Xoven17 pretende formar a 15 mozos e mozas como socorristas e auxiliares de deportes O Concello de Vilagarcía concorre un ano máis á convocatoria de axudas autonómicas para a organización de obradoiros de emprego. A intención do executivo local é dispor este ano dunha nova edición do programa Labor@Xoven , para o cal xa se remitiu á Xunta de Galicia a solicitude de subvención e o proxecto laboral e formativo co que se pretende contratar a 15 mozas e mozos desempregados. A suma solicita á Xunta para financiar esta iniciativa ascende a 140.188 euros aos que o Concello sumará 25.000 euros máis.
11.05.2017.- O proxecto deseñado pola Concellería de Promoción Económica prevé dúas especialidades formativas: a de Operacións auxiliares na organización de actividades e funcionamento de instalacións deportivas e a de Socorrismo en espazos acuáticos.
Como establece a orde que regula a concesións destes programas, os alumnos seleccionados recibirán unha etapa de formación teórica e rematarán coa realización de prácticas laborais para a realización de obras e servizos de utilidade colectiva adscritos á Fundación Municipal de Deportes e ao Servizo Municipal de Emerxencias.
As tarefas a desenvolver no caso do módulo de Operacións deportivos serán as de asistencia operativa aos técnicos deportivos no desenvolvemento de actividades deportivas, tarefas de control de acceso, circulación, asistencia a usuarios e mellora da seguridade nas instalacións deportivas de titularidade municipal.
Os alumnos-traballadores da especialidade de Socorrismo acuático realizarán asistencia operativa aos Servizos Municipais de Emerxencias e a Fundación Municipal de Deportes nas actividades de socorrismo en espazos acuáticos realizándose en espazos de titularidade municipal do Concello como a piscina, sita no complexo deportivo de Fontecarmoa e espazos naturais de uso público, como as praias da Concha, Compostela, Preguntoiro e Campanario, cuxa competencia en servizos de Protección Civil e Municipal.
Unha vez presentada a solicitude, o Concello debe esperar a que a Xunta decida e comunique a súa resolución.