MEDIO AMBIENTE
O Concello apaga as fontes ornamentais e fai un chamamento ao consumo responsable da auga O Concello de Vilagarcía decidiu apagar temporalmente as fontes ornamentais do municipio co obxecto de aforrar no consumo de auga despois dun inverno e unha primavera especialmente secos que provocan que as reservas de auga estean por debaixo do nivel recomendable. En consonancia con esta primeira medida adoptada polo Concello, dende a Concellería de Medio Ambiente faise un chamamento á poboación para que fagan un consumo responsable do auga nas súas casas e traballos.
23.06.2017.- A situación do abastecemento de auga potable en Vilagarcía non periga polo de agora, pero podería chegar a selo se proseguen as altas temperaturas e non se rexistran choivas despois de varios meses de seca. Esta é a razón pola que o departamento que dirixe Lino Mouriño decidiu comezar a aplicar medidas preventivas de aforro de auga nestes días nos que as altas temperaturas elevaron de forma considerable o consumo de auga.
A concellería mantense en situación de prealerta e manterase en contacto coas autoridades autonómicas para, no caso de persistir esta situación, ampliar as medidas de aforro de auga e, de ser necesario, incluso chegar a restrinxir determinados usos.
Independentemente de cómo evolucione a situación, Mouriño lembra que a auga é un ben limitado, tamén en Galicia, e que todos os cidadáns debemos concienciarnos e tomar medidas na nosa vida cotiá para aforrar o máximo o consumo deste prezado e necesario elemento.