MEDIO AMBIENTE
Alberto Varela logra o apoio da Deputación ao proxecto da Vía Verde do Salnés A Deputación de Pontevedra apoiará o desenvolvemento do proxecto da Vía Verde do Salnés, que promoven conxuntamente os concellos de Vilagarcía, Caldas e Portas. O alcalde vilagarcián, Alberto Varela, aproveitou onte a súa visita a Pontevedra con motivo da presentación dos festivais de verán que inclúen ás Revenidas, para manter unha reunión de traballo coa presidenta do ente provincial, Carmela Silva, a quen presentou o proxecto da Vía Verde.
27.06.2017. Silva valorou moi positivamente o plan, non xa porque será o primeiro das súas características en Galicia, senón polo que suporá no fortalecemento da oferta turística da provincia e significadamente dos tres concellos e as súas comarcas. O alcalde explicoulle os pormenores do proxecto, con case dez quilómetros de vía ferroviaria recuperada, que inclúe unha ponte de ferro sobre o Umia (unha estrutura de 64 metros de lonxitude e 3 vanos que se considera un dun excelente exemplo da enxeñería ferroviaria de finais de século XIX), e o investimento necesario, algo más de 530.000 euros.
Con todo, e tendo en conta a importancia desta vía, a presidenta de Deputación expresoulle ao alcalde vilagarcián a necesidade de que Xunta e Estado se impliquen tamén no seu desenvolvemento. Neste sentido, Alberto Varela comentoulle que xa están explorando distintas vías de financiamento por parte dos tres concellos. Con todo, e se pasado un tempo prudencial, nin goberno estatal nin autonómico fan público ese compromiso, sería a Deputación quen aseguraría o proxecto cunha aportación maior, nunha demostración do seu apoio á Vía Verde e á iniciativa conxunta dos tres concellos, dous con goberno do PSOE e un do PP.
Os rexedores de Vilagarcía, Caldas e Portas seguen traballando coa idea de que no prazo dun ano a Vía Verde do Salnés poida ser unha realidade.