FESTAS
Goberno local e Confraría buscan puntos de encontro que permitan celebrar a Festa da Ameixa O goberno local e confraría e parquistas buscan puntos de encontro para que se poida celebrar a Festa da Ameixa 2017. O patrón maior da Confraría de Carril e da Agrupación de Parquistas, que hoxe se comprometeu a elaborar o plan de autoprotección que se cita nos informes da Policía Local e de Emerxencias para poder garantir a seguridade na Festa da Ameixa, participou hoxe nunha reunión na que, polo goberno local, asistiron a portavoz, Tania García, e o concelleiro de Promoción Económica, Juan Antonio Pérez Callón.
11.07.2017. García e Pérez Callón lle manifestaron ao patrón maior, unha vez máis, a súa disconformidade coas datas elixidas unilateralmente polos organizadores, os días 19 e 20 de agosto, posto que aos problemas de seguridade se unen os de intendencia –medios personais e materiais, que non son ilimitados- e de oportunidade: a coincidencia de datas en nada beneficia á promoción turística de Vilagarcía de Arousa nin á tan demandada desestacionalización da oferta.
Con todo, e ante o empeño de Confraría e Parquistas en manter as datas, o concello está disposto a ofrecer todo o que estea na súa man, pero con contraprestacións por parte dos organizadores. Así, o plan de autoprotección deberá ser avaliado polos servizos municipais, e iso implica, ademais de vixilancia, medios de emerxencias, como ambulancia e atención médica.
En cuanto ás cuestións de pura intendencia –palcos, valados, cadeiras, carpas, billeteiras, limpeza, etcétera- o Concello comprometeuse a chegar a onde sexa posible, dentro das posibilidades de recursos humanos e materias dos que dispón e tendo en conta, precisamente, a multitude de actos previstos para ese fin de semana. Alá onde non poda chegar o concello polos seus propios medios, deberán facelo os organizadores e para iso será necesario que presenten unha relación detallada de todo o que precisan. En función diso se lles comunicará que pode facer o concello e que teñen que asumir Confraría e Parquistas.
Con todo, o patrón maior e presidente dos parquistas non aclarou hoxe se conta ou non con permiso de Costas para realizar a anunciada verbena na praia de Compostela e como pensa garantir a integridade do paseo marítimo tralo paso de camións de gran tonelaxe. O goberno local segue sen entender que aporta unha verbena un domingo pola noite trala degustación de ameixa ao mediodía a unha festa gastronómica, pero, como no caso anterior, tratará de colaborar na medida das súas posibilidades e sempre garantindo a seguridade, a legalidade e a integridade dos bens públicos.