VILAGARCIA DE AROUSA

FESTAS
A Noite das Meigas leva maxia, música e queimada á última fin de semana das festas de agosto
Vilagarcía segue de festa ata a última fin de semana de agosto, días nos que o Concello aínda ten programados diversos actos lúdicos, culturais e solidarios. Entre eles, a Noite das Meigas que se celebrará o sábado pola noite e que encherá de ledicia as rúas peonís do casco urbano. Dez poboados meigos emprazaranse nos lugares habituais para alegrar a velada con música, disfraces, rosquillas e queimada. A novidade deste ano é que o espectáculo pirotécnico será na Avenida da Mariña.

23.08.2017.- A festa promovida polo Concello conta coa colaboración e participación de 10 colectivos veciñais e culturais do municipio que serán os encargados de animar os poboados meigos habilitados en distintos lugares do centro da cidade. O Concello encárgase da montaxe dos poboados e da loxística necesaria para que a ambientación estea a punto á tardiña. A Concellería de Cultura aporta os 600 litros de augardente, 100 quilos de azucre, as laranxas, limóns e o café necesarios para elaborar a tradicional queimada que todos os poboados servirán de balde a partir da media noite. Tamén por deferencia de Cultura repartiranse 3.000 rosquillas entre os asistentes e 300 cunquiñas de barro para servir a queimada.

A carta gastronómica amplíase coas especialidades que cada entidade aporta a motu propio e que van dende os callos ata a tortilla, pasando por empana , os chourizos ao viño ou a bica.

A festa comezará ás 22:00 horas e o reparto da queimada farase a partir da medianoite, momento no que tamén se producirá a queima da meiga e o espectáculo pirotécnico na zona da Mariña.

Os colectivos que participan na Noite das Meigas deste ano e os emprazamentos dos seus poboados son: o Noso Lar (Alameda), Fontefría de Guillán (Juan García), Malveiras de Carril (Praza de Galicia), A Cantarela (Castor Sánchez esquina Avd da Mariña), A.C Lumarada Xardíns da Praza de España), Zona Aberta (esquina Valentín Viqueira coa Baldosa), Nós de Sobradelo ( Rey Daviña) Os Remolóns (Castelao fronte a farmacia Bermejo), La Junquera-Protección Civil (O Castro) e A.C. Cantareiras Bulideriras de Fontecarmoa (Final da Rúa Castelao inicio Vista Alegre).