VILAGARCIA DE AROUSA

MEDIO AMBIENTE
O concello concede as primeiras axudas ás comunidades de montes, por valor de 11.000 euros
Cumprindo co compromiso adquirido na negociación dos últimos presupostos municipais, o goberno local aprobou xa as primeiras subvencións para as comunidades de montes a fin de contribuír a sustentabilidade das masas forestais e previr incendios. En concreto, trátase de algo máis 5.700 euros para cada unha das comunidades de Bamio y de Loenzo de Arriba e de Abaixo.

04.11.2017. Ambas entidades presentaron os seus proxectos de xeito individual, mentres que as restantes comunidades do municipio (Rubiáns, Trabanca Sardiñeira, Cea, Guillán, Sobrán-Vilaxoán e Trabanca Badiña) o fixeron de forma conxunta a través da súa mancomunidade. Neste caso, o goberno local está pendente de que, como no caso de Bamio e Loenzo, presenten a documentación acreditativa das obras realizadas para liberar os máis de 70.000 euros que lle corresponden.

En principio, a partida establecida nos Orzamentos era, precisamente, de 70.000 euros. Sen embargo, a suma total dos proxectos foi de 84.000 euros. Para que as axudas chegaran ao 100%, o executivo de Alberto Varela decidiu suplementar a partida ata completar esa cantidade.

As comunidades de montes de Loenzo e Bamio presentaron cadanseu proxecto para levar a cabo tarefas de rareo manual e mecanizado e selección de gromos de cepa de eucalipto e frondosas despois dun lume. Pola súa banda, a Mancomunidade de Montes Veciñais en Man Común de Vilagarcía presentou dous proxectos. O primeiro, de actuacións para os montes das comunidades de Rubiáns, Trabanca Sardiñeira, Cea, Guillán e Sobrán-Vilaxoán, consistentes en mediante rozas manuais e mecanizadas, rareos, recollida e trituración de restos. O segundo proxecto, aínda que presentado tamén a través da Mancomunidade, é exclusivo para a Comunidade de Trabanca Badiña, consistente na construción dun depósito de auga para ser facilitar e axilizar as labores de extinción de lumes, de ser o caso. As actuacións están practicamente rematadas e só falla xustificalas documentalmente para que o Concello aprobe e libre as subvencións comprometidas.

É intención do goberno local seguir mantendo esta liña de colaboración coas comunidades de montes para axudar a manter limpas as masas forestais, facelas sustentables e evitar, na medida do posible, os danos que causan os lumes.