OBRAS E SERVIZOS
O Concello destina 41.284 euros a ampliar a rede de saneamento na zona de a Granxa-Guillán O Concello continúa co seu Plan de Mellora do Saneamento municipal, neste caso cunha nova actuación no rural. A obra proxectada consistirá na ampliación da rede na zona de A Granxa, en Guillán, e suporá un investimento de 41.248 euros a financiar con fondos propios do Concello. Os traballos permitirán dotar de servizo a varias vivendas ás que ata o de agora non chegaba a rede, e aproveitaranse para mellorar a recollida de pluviais.
28.11.2017.- A memoria desta actuación no saneamento foi aprobada esta semana pola Xunta Local de Goberno. A nova canalización discorrerá en parte por viais municipais e en parte por terreos privados, por iso con anterioridade o concelleiro de Relacións Veciñais, Lino Mouriño, fixo as xestións oportunas cos propietarios de fincas do lugar para que autorizasen o paso de parte da infraestrutura polas súas terras. Os veciños xa firmaron a cesión do uso dos terreos.
A obra consistirá na instalación dun novo tramo de saneamento para dar servizo a unha zona que carecía do servizo. Ademais de colocar o colector de PVC, que irá conectado co colector existente, construiranse os necesarios pozos de rexistro e realizaranse as conexións de acometidas domiciliarias. Os traballos aproveitaranse tamén para instalar unha canal de drenaxe coa que reforzar a recollida de augas pluviais. Posteriormente procederase á reposición total do firme da praza da Granxa mediante pavimento de formigón. Tras aprobarse a memoria elaborada polo Enxeñeiro municipal, o expediente pasa ao Servizo de Contratación para proceder a licitar a obra que ten un prazo de execución de 1 mes.
O ANO PASADO AMPLIOUSE A RÚA XABREIRA No marco de actuacións de mellora levadas a cabo en Guillán nos últimos meses compre salientar a mellora e ampliación da Rúa Xabreira executadas a finais do pasado ano. Con esta obra resolvéronse as deficiencias que presentaba a vía, instalándose canalizacións facéndose cunetas mellorando o firme mediante formigonado. Nesta actuación o Concello investiu 25.800,32 euros tamén financiados a través das arcas municipais.