EDUCACIÓN
Programada unha nova remesa de melloras nos centros educativos cun investimento de 30.000 euros O Concello de Vilagarcía, a través da Concellería de Educación que dirixe Argimiro Serén continúa realizando investimentos nos colexios do municipio. Nesta ocasión, os traballos a executar afectarán a catro centros educativos e precisan dun investimento algo superior aos 30.000 euros que financia integramente a administración local. A compra do material foi adxudicada na última reunión da Xunta Local de Goberno á firma Metalúrgica Cuevas, polo que os traballos executaranse tan pronto como se sirvan os elementos necesarios (portas, enreixados, viseiras galvanizadas…).
08.12.2017.- Os traballos que vai a acometer o Concello responden ás necesidades que os equipos directivos dos centros trasladaron a Serán nas reunións de carácter periódico que o concelleiro mantén cos responsables dos colexios e ANPAS.
No colexio Rosalía de Castro vanse a repoñer un tramos do peche metálico exterior que se atopaban moi deteriorados e non podían ser arranxados. No CEIP da Escardia tamén se reporá un tramo de peche, ademais cambiar un portal metálico.
No colexio de Rubiáns tamén é preciso substituír unha porta exterior metálica e no do Piñeiriño reformarase un voadizo do pavillón de deportes para evitar que caia auga sobre a porta principal da instalación deportiva.
O material a subministrar por Cuevas componse de unha porta batente, unha viseira de aceiro galvanizado e paneis sandwich, módulos de reixa de malla electrosoldada e un portal de dúas follas. O custe total do material ascende a 30.078 euros.
Estas actuacións de mantemento dos centros educativos son independentes das labores de posta a punto que o Concello fai todos os anos durante os meses de verán. Antes destes traballos, xa se acometeu outra obra similar no Anexo A lomba, neste caso para mellorar a seguridade do centro. Consistiu na elevación do portal de entrada e dos laterais da verxa para evitar a entrada de persoas alleas que accedían ao recinto polas noites saltando a porta e que realizaban estragos. Dentro desta mesma actuación, que contou cun investimento de 4.458 euros, tamén se resolveron os problemas de recollida de pluviais da cuberta do patio exterior.