VILAGARCIA DE AROUSA

CONCELLO
Os representantes da corporación analizan o venres as alternativas para continuar a tramitación do PXOM
.- O alcalde de Vilagarcía, Alberto Varela, convocou para o venres ás 11 da mañá aos representantes da Corporación Municipal co obxecto de abordar conxuntamente as alternativas existentes para poder continuar coa tramitación do PXOM. Como se sabe, o Concello de Vilagarcía, igual que outros moitos municipios galegos, veu paralizada o proceso de redacción e tramitación do plan xeral tras a decisión de Eptisa de prescindir da súa sección de planeamento como consecuencia da nova liña de traballo imposta pola dirección da multinacional chinesa que absorbeu á consultora.

03.01.2018.- O grupo de traballo, no que están representados todos os grupos da Corporación, analizará os informes técnicos e xurídicos dos servizos municipais, así como as alternativas existentes para salvar este novo obstáculo no marco da normativa á que está sometida toda administración pública.

O goberno local confía en que a solución que finalmente se decida adoptar posibilite manter o calendario previsto no seu día, é dicir, lograr a aprobación inicial do PXOM dentro do actual mandato.

No momento no que Eptisa renunciou á continuar os traballos, o documento inicial xa estaba elaborado e remitido á Xunta de Galicia na primavera de 2017. A principios de verán e seguindo o procedemento habitual, o Servizo de Avaliación Ambiental de Plans e Programas demandou ao Concello que complementase a información técnica enviada co obxecto de poder realizar a análise pertinente antes de someter o documento á consulta do órgano competente en materia de urbanismo.

A información requirida non se puido remitir, posto que foi nese momento cando Eptisa renunciou ao contrato. Dende entón e ata o de agora, o Concello mantivo reunións co persoal despedido por Eptisa que se encargada da sección de planeamentos en busca de solucións e requiriu os informes técnicos e xurídicos correspondentes ás posibles alternativas que se planean para saír deste escollo. Isto será o que terá que dicir o venres o grupo municipal de traballo.

Tras a reunión do venres, unha vez decidida a medida a levar a cabo, a tramitación do PXOM tería que continuar co envío da documentación complementaria que requiriu a Xunta. Tras obter o informe favorable, o documento deberá someterse a aprobación inicial por parte do Pleno, algo que o executivo de Varela pretende que poida facer antes de que remate o actual mandato. A continuación, abriríase o prazo de exposición pública e presentación de alegacións . Unha vez informadas e resoltas estas , p PXOM debería regresar ao Pleno para a súa aprobación provisional e, finalmente, volvería a remitirse á Xunta de Galicia á que lle corresponde aprobar definitivamente o planeamento.