CULTURA
A Vilagarcía nocturna cobra protagonismo a través das fotografías de Carlos Ocaña A sala de exposicións do Auditorio estrea mañá unha nova mostra, nesta caso fotográfica. Carlos caña é o autor da colección de imaxes que teñen como características en común, recoller lugares e estampas da cidade e que todas elas están feitas de noite, de aí o título da exposición “Nocturnidade”. A mostra inaugúrase mañá e poderá visitarse ata o 8 de marzo.
18.01.2018.- Carlos Ocaña foi mariñeiro de profesión. Durante as súas estancias traballando nas costas de África iniciouse no mundo da fotografía xa que este era o mellor medio que tiña para transmitir as súas vivenzas a familiares e amigos. Esta etapa abranguiu o período comprendido entre os anos 1979 e 1986. Posteriormente, decidiu perfeccionar a súa afección e fixo cursos de fotografía, en 2013 coo fotógrafo Carlos Puga e en 2015 con José Romay.
Ocaña participou en varios concurso de fotográficos para afeccionados como a Maratón Fotográfica da Concellería da Muller de Vilagarcía de Arousa, onde obtivo o primeiro premio no ano 2011. Tamén foi premiado co máximo galardón no Concurso Fotográfico Inchadiña Branca Vela, convocado polo Padroado Rosalía de Castro, nas edicións de 2015 e 2016.
O traballo de Carlos Ocaña xa formou parte de exposicións no Gato Negro de Carril en 2016 e no Auditorio Municipal de Rianxo en 2017.