VILAGARCIA DE AROUSA

FESTAS
Sete comparsas da comarca abrirán o Entroido de Vilagarcía no certame do domingo
Vilagarcía xa ten todo listo para celebrar o Entroido 2018, unha das celebracións máis esperadas e divertidas do ano. O programa abrirase este domingo, 11 de febreiro co tradicional Certame de Comparsas no que este ano participarán sete agrupacións da comarca. O luns será o día dos nenos e das nenas e o martes terá lugar o vistoso desfile de disfraces e carrozas. Como novidade, a Concellería de Cultura contrata este ano a dúas comparsas do municipio para realizar pasarrúas durante a xornada do Martes de Entroido.

07.02.2018.- O Auditorio Municipal será o escenario do Certame de Comparsas que se celebrará o domingo a partir das cinco da tarde. A entrada é libre e de balde ata completar aforo. Este ano actuarán sete comparsas de municipios da comarca, entre elas algunhas cunha longa traxectoria, como Maraghota e Media, de Vilaxoán, ou As máis Plus, do Grove; e outras máis novas, como Jana de Leria ou A Tropa de Moncha A Caralla, ambas do Grove e que participan por primeira vez no festival vilagarciá. A lista de comparsas complétana O Xoubal (Vilaxoán), Os de Noalla (Sanxenxo) e Leña Verde (O Grove). Dado que o certame de Vilagarcía non ten carácter competitivo, a Concellería de Cultura concederá unha compensación económica de 300 euros a cada unha das agrupacións.

Baile Infantil
Como tamén é tradición en Vilagarcía, o luns é o día destinado aos máis cativos da casa. Para eles, a Concellería de Xuventude organiza o Baile Infantil de Disfraces que terá lugar na Praza da Peixería de 17 a 20 horas. O festival estará amenizado por Javi Solla e, ademais de música e baile, haberá outras actividades de dinamización nas que poderán tomar parte os nenos e nenas asistentes. Haberá globlofexia, xogos e farase un chisco á historia e patrimonio local con algunha referencia aos petroglifos dos Ballotes e ao castro de Alobre.

Unha das novidades deste ano na programación deseñada pola Concellería de Cultura é que se inclúen pasarrúas para animar as zonas de ambiente o martes de Entroido. Serás as comparsas de Vilaxoán Maraghota e Media e O Xoubal as que dinamicen as zonas peonís e hostaleiras interpretando as súas chirigotas carnavalescas. O pasarrúas de mañá farase a partir do mediodía é á hora dos aperitivo, mentres que á de tarde será nas horas previas ao comezo do desfile. Deste xeito, o departamento que dirixe Sonia Outón contribúe a ambientar e dinamizar a actividade hostaleira ademais e segue apoiando aos grupos locais e fomentando a súa participación nos eventos socio culturais da cidade.

Precisamente, as rúas da cidade encheranse de color e imaxinación a tarde do martes de Entroido co desfile de disfraces e carrozas que comezará ás 17:00 horas. Os interesados en participar no concurso que entregará 24 premios (12 na categoría de adultos e 12 na infantil) cunha dotación económica total de 4.125 euros.
Os interesados en concursar poderán inscribirse nas dependencias de Cultura (sitas no Auditorio) ata o mediodía do mesmo martes 13 de febreiro.

As bases do certame de comparsas e do desfile concurso de disfraces están dispoñibles no taboleiro de anuncios da web http://www.vilagarcia.es