VILAGARCIA DE AROUSA

CONCELLO
Adxudicada a substitución do ascensor do paso soterrado da Escardia por 48.400 euros
A Xunta de Goberno Local acordou na reunión de hoxe adxudicar á firma Schindler o contrato menor para a renovación do ascensor do paso baixo o tendido ferroviario que comunica a zona de A Torre co barrio de A Escardia. Cun investimento de 48.377 euros (IVE incluído), a actuación permitirá mellorar o servizo que utilizan a diario moitos veciños de ámbalas dúas zonas do municipio, así como poñer fin aos problemas que a instalación viña rexistrando, con numerosas avarías debido á antigüidade da maquinaria actual e ás frecuentes filtracións de auga que sufría. A obra ten un prazo de execución de catro meses.

13.11.23.- Os traballos contratados consistirán en substituír o actual elevador e a súa maquinaria por equipos de última tecnoloxía que, ademais de ter mellor rendemento e de aportar maior comodidade e seguridade aos usuarios, tamén son máis resistentes e consumen menos enerxía, en cumprimentos dos criterios de sustentabilidade e de eficiencia enerxética.

Entre as melloras que inclúe o novo equipamento está un sistema de seguridade que, en caso de parada ou de corte do subministro eléctrico, mantén sempre unha reserva de enerxía suficiente para levar o elevador ata o nivel máis próximo e abrir as portas, de xeito que a xente non quede atrapada no seu interior ata que se arranxe a avaría ou volva a electricidade.

Un dos principais problemas que sufre o actual ascensor e principal causa das avarías é a entrada de auga. Para resolver esta situación, o contrato inclúe os traballos de illamento, impermeabilización e saneamento das paredes interiores e do foso, e tamén a colocación dunha viseira na saída ao exterior, na parte superior do elevador, para protexer a instalación da auga da chuvia.

O uso intensivo do ascensor actual, xunto cos anos que levaba instalado e os actos vandálicos, son as causas das frecuentes avarías e do mal funcionamento da instalación. En atención ás demandas da veciñanza das zonas ás que da servizo o equipamento e tamén por garantir a completa accesibilidade, o goberno local optou por levar a cabo a mellora que se financia cos remanentes do orzamento municipal de 2022. A obra non se adxudicou ata o de agora porque houbo que esperar á entrada en vigor do reparto dos remanentes aprobado polo Pleno, acordo que non contou co apoio do grupo municipal do PP.