 Observaciones |
|
|
O Camiño de Santiago significou na historia europea un dos primeiros elementos vertebradores do vello continente. O achado do sepulcro do primeiro apóstolo mártir no século IX supuxo atopar un punto de referencia que contribuíu á consolidación dos territorios conquistados polas emerxentes monarquías cristiás, ademais de abrir diferentes vías de conexión coa Europa cristiá e co mundo musulmán da Al-Andalus.
A exposición “Europa foi camiño. A peregrinación a Santiago na Idade Media”, realizada pola Obra Social de La Caixa, coa colaboración do Concello de Vilagarcía, pretende mostrar ao visitante, a través de seis ámbitos diferenciados, a orixe do Camiño de Santiago, a súa construción, a vida cotiá durante a peregrinaxe e as infraestruturas que deron forma á principal vía de peregrinación da Europa medieval.
A mostra propón un itinerario que evoca o propio Camiño de Santiago coa vontade de que o espectador se converta en peregrino e visite algunhas das súas principais paradas a partir da recreación de diferentes ambientes mediante escenografías: o mercado, os talleres de artesanía, os scriptoria, un hospital coa súa botica ou o interior da catedral románica de Santiago durante a Idade Media. O proxecto da exposición “Europa foi camiño. A peregrinación a Santiago na Idade Media” foi dirixido por José Manuel García Iglesias, catedrático de Historia da Arte da Universidade de Santiago de Compostela e comisario xeral das exposicións do Xacobeo 2004. O comisario da mostra é o profesor titular de Historia da Arte da Universidade de Santiago de Compostela, Juan Manuel Monterroso Montero.
Horario:
De martes a domingo, de 11.00 a 14.00 h e de 18.00 a 22.00 h.
Luns non festivos, pechado
Visitas guiadas:
De martes a domingo, ás 12 e 19 h
Outras reservas:
902 906666
|
