Observaciones |
|
|
Carlos Latre, Manel Fuentes, Rafael Álvarez “El Brujo”, Carles Flaviá, Tricicle, Lucrecia, Juan Perro, Cómplices, Carlos Blanco, Quico Cadaval, Mofa e Befa, Miguel de Lira, Kukas, Cándido Pazó, “Vilaxoán Canta” e Xoán de Vilaxoán, a vila mariñeira onde naceu Pepe Rubianes, conforman o elenco de artistas que encherán o escenario durante case tres horas. Ademais, hai amigos de Pepe Rubianes que non poderán estar fisicamente pero si o farán a través do vídeo, como Joan Manuel Serrat, entre outros.
Para a ocasión, o pavillón de Fontecarmoa converterase nun teatro con capacidade para preto de 1.600 persoas. A entrada será mediante invitación que deberá ser retirada entre o luns 31 de agosto e o mércores 2 de setembro, na propia Casa Consistorial (salón de plenos) con horario de 9,00 a 14,00 horas pola mañá e de 17,00 a 20,00 horas pola tarde. Cada persoa poderá retirar unicamente dúas entradas, que teñen carácter gratuíto.
José Rubianes Alegret (Pepe Rubianes) naceu en Vilaxoán (Vilagarcía de Arousa) o 2 de setembro de 1947. Sendo moi novo trasladouse a Barcelona xunto coa súa familia. Alí desenvolveu a maior parte da súa vida e da súa carreira artística, pero nunca esqueceu as súas raíces. Como el mesmo adoitaba dicir, “son un actor galaico-catalán, porque nacín en Galicia pero non vivín alí case nunca e vivo en Cataluña, a pesar de que non nacín alí”. Pepe Rubianes ten numerosos familiares en Vilagarcía, polo que adoitaba facer algunhas visitas á súa vila natal, de cuxas festas foi pregoeiro en 1991.
|