|
O evento transfronteirizo reunirá en Vilagarcía ós 110 concursantes procedentes dos municipios de Galicia e Portugal que superaron as fases previas celebradas o mes pasado nas localidades lusas de Mirandela e Vila Real.
Vilagarcía quenta motores para acoller a final da II Mostra Musical do Eixo Atlántico que se desenvolverá o sábado no Auditorio. Polo escenario vilagarciá pasarán dez concursantes (entre solistas e agrupacións) de vilas portuguesas e cinco de municipios galegos. Vilagarcía contará con tres concursantes todos eles alumnos do Conservatorio Profesional de Música da localidade. Son na modalidade de solistas Luis Benito Alba Salgueiro (de 19 anos), ao trombón e o saxofonista Lucas Meda Herbojo (22 anos). No apartado de agrupacións de cámara participa o dúo de bombardino e piano composto por Adrián Martínez Vieitez (16 anos) e Marta Torres Sánchez (17 anos).
A representación galega na final complétase con concursantes procedentes de Vigo, Santiago e Coruña, mentres que pola parte lusa participarán músicos noveis das localidades de Vila do Conde, Vila Real, Mirandela e Viana do Castelo.