 Observaciones |
|
|
No ano 1983 catro rapaces do Morrazo fundan un grupo de rock coa idea de facer versións heavys para tocar nos locais que eran berce da movida rockeira galega. 27 anos despois eses “rapaces” seguen na brecha e conforman, xunto con Los Suaves, o punto álxido do heavy-rock galego. Cunha particularidade, o uso da lingua galega. Especialmente a partir do seu quinto disco, ‘O sentir dunha terra’, sen dúbida o disco da consagración do grupo, e unha homenaxe impactante á cultura musical galega. Astarot soprende rockanrolizando a música galega sen límites, con cancións como ‘Negra sombra’ , ‘Unha noite na eira do trigo’ ou ‘Miudiño’, nun traballo que ten colaboracións de artistas como Suso Vaamonde, Os Tamara, Susana Seivane ou Fuxan vos Ventos.
O seu sexto, e ata o de agora último traballo en estudio, ‘Longa noite de pedra’, é un disco de culto aos poetas galegos a través da música. Rosalia, Curros, Celso Emilio, Bernardino Graña, Méndez Ferrin, Darío Xohan Cabana… pasados polo tamiz musical de Astarot.
O pasado ano o grupo editou un disco no que recolle un dos seus contundentes directos, neste caso o que ofreceron no parque de Castrelos en Vigo. Un disco que se semella bastante ao repertorio que o grupo nos ofrecerá en Vilagarcía e no que incluén cancións como ‘A Santiago vou’ ou unha acelerada versión da ‘Rianxeira’.
|
