|
A Asociación Arousa en Bici en colaboración coa Concellería de Xestión do Territorio, convida ós vilagarciás a participar no seu tradicional Paseo Nocturno en Bici. Esta proposta enmárcase dentro das actividades organizadas polo Concello este ano no marco da celebración da Semana Europea da Mobilidade.
A saída será dende o Parque do Cavadelo ás 21.30 horas cun percorrido que irá dende Carril a Vilaxoán. A fin desta iniciativa é fomentar a utilización de medios alternativos ó coche nos desprazamentos dos vilagarciáns e crear afección por este deporte entre adultos e nenos.
A actividade irá destinada ó público en xeral, sen límite de idade, coa condición de que os participantes procuren acudir á cita equipados cos elementos de seguridade obrigatorios e coa bicicleta ben iluminada. Como recompensa deste evento lúdico, a organización sorteará entre os asistentes diferentes accesorios ciclistas.