 Observaciones |
|
|
Panci Calvo (batería), Alfonso Veiga (baixo) e Chus Neira (órgano Hammond e sintetizadores analóxicos) compoñen o núcleo duro de Groovie Doobie Groove, unha das formacións máis veteranas na escena soul e funk do norte do Estado.
Nacidos a finais dos noventa tras unha longa rodaxe en bandas de blues e rhythm’n’blues, Groovie Doobie Groove reúne na súa formación a tres músicos de longuísimo percorrido que curtiron o seu currículo con colaboracións no jazz, o rock e o blues (Chicago Train Blues, Big Man, Estación Blues, Pantano...).
Sobre os escenarios, Groovie Doobie Groove compórtanse como unha maquinaria perfecta que combina e engrana moi distintos estilos de música negra: dende o blues evolucionado ao funk pasando polo jazz progresivo e, por suposto, o groove. O seus concertos son un espectáculo instrumental que rinde tributo a mestres do xénero como James Brown, Jimmy Smith, Brian Auger, James Taylor Quartet ou Keith Emerson.
Deles escribiuse:
“Unha xenial ración de acid jazz completamente instrumental dominada polas teclas enérxicas, febrís e líderes”.
“Correctos exercicios de jazz setenteiro, acertadas recreacións dos bulebules do primeiro, incisivo e toleado James Taylor Quartet, homenaxes a James Brown suxeridos en números de funk, cotas máximas que certificaban a súa devoción polo clásico, celero e luxoso estilo do Hammond de Jimmy Smith, tributos a Stanley Kubrick facturado cun sintetizador neolítico, algún toque de garaxe, un único exceso progresivo propio de Rick Wakeman, e toneladas de idiosincrasia do jazz máis lúdico, danzarín e movedor”
“Viaxan con finura, sutileza e moita elegancia polos mundos da música negra: desde as visións da antiga fusión até as nomenclaturas máis contemporáneas”.
|
