EDUCACIÓN
O alcalde solicita unha entrevista co conselleiro de Educación para abordar a situación dos colexios O alcalde de Vilagarcía, Alberto Varela, solicitou esta mañá unha entrevista co conselleiro de Educación, Román Rodríguez, co obxecto de abordar a situación dos colexios do municipio e, máis en concreto, a do centro Rosalía de Castro de Carril.
06.03.2018.- O último contacto oficial mantido coa Consellería produciuse a semana pasada (o 28 de febreiro) a raíz da chamada de Varela ao conselleiro para expoñerlle o malestar da ANPA do centro carrilexo pola demora do comprometido arranxo dos aseos. Froito desta conversa, Román Rodríguez comprometeuse a enviar un técnico ao centro para avaliar o custe da actuación integral a levar a cabo no centro, incluída a substitución da deteriorada fontanería.
O rexedor local confía en que o conselleiro o reciba canto antes co obxecto de buscar solucións á precaria situación na que se atopa o colexio de Carril tras a falta de investimentos en obras que son competencia exclusiva da Consellería, como acontece noutros centros do municipio.