CONCELLO
Os alcaldes concretan en Santiago os trámites para a execución da Vía Verde Os alcaldes de Vilagarcía, Caldas e Portas desprazáronse onte a Santiago para concretar coa Xunta o procedemento legal a seguir de cara á execución da Vía Verde do Salnés que discorre por territorio dos tres municipios. Como se sabe, Xunta e Deputación comprometeron a súa colaboración para financiar a que será a primeira Vía Verde integramente galega, unha colaboración moi positiva pero que, por implicar a cinco administracións, prolonga un pouco máis a tramitación. Para concretar este aspecto, os tres rexedores entrevistáronse coa directora xeral de Patrimonio Natural da Xunta de Galicia.
10.03.2018.- Para articular a concesión das axudas para financiar o proxecto, os concellos deberán asinar un convenio de colaboración coa Xunta de Galicia e outro coa Deputación provincial de Pontevedra. Segundo a secretaria xeral explicou aos rexedores, a Consellería de Medio Ambiente pretende financiar a súa parte da Vía Verde do Salnés a través dos Fondos Feder. Para xustificar a subvención ante os organismos europeos, a Xunta debe licitar directa e individualmente a parte da obra que financiará. O resto da obra podería licitala nun todo a Deputación de Pontevedra.
Estes serían os únicos trámites que quedarían para poder iniciar a obra para o cal disponse hai meses do proxecto proxecto elaborado pola Fundación de Ferrocarrís Españois para a creación da senda de uso peonil e ciclista aproveitando o trazado ferroviario en desuso entre estas tres localidades.A execución do proxecto ascende a 565.533 euros que se financiarán entre os concenllos, a Xunta e a Deputación.
A Vía Verde do Salnés terá una lonxitude de 9,195 quilómetros partindo de Abelle (Rubiáns), pasando por Caldas e rematando na estación de Portas, nas inmediacións da vella azucareira. O trazado repártese entre os 1.795 metros que discorren polo termo municipal de Vilagarcía, os 4.917 de Caldas de Reis e os 2.483 de Portas. Ao longo do seu percorrido destacan varios lugares e puntos de interese, como o Pazo de Rubiáns, o antigo apeadeiro de Ande, a ponte metálica sobre o Umia ( que se recuperan con estre proxecto) ou a Azucareira de Portas; ademais do atractivo etnográfico e natural co que conta, con exemplos da arquitectura popular típica do rural galego, os minifundios ou o bosque autóctono. Para gozar destes atractivos o proxecto prevé a creación de 3 áreas de descanso e 2 miradoiros.
Ademais de acondicionar a senda en si, o proxecto inclúe a sinalización homologada das Sendas Verde de España, paneis informativos ao inicio final e nos distintos puntos de acceso intermedio; así como con mobiliario, como bancos, papeleiras...