AVISOS
Persoas Maiores difunde as axudas autonómicas para ascensores e outros dispositivos de accesibilidade en vivendas A Área de Persoas Maiores do Concello de Vilagarcía faise eco das axudas autonómicas para a instalación de ascensores e outros dispositivos de accesibilidade en vivendas privadas. A convocatoria da Xunta de Galicia publicouse no DOG de onte e os interesados en acceder a estas subvencións dispoñen de prazo ata o 30 de maio para presentar as súas solicitudes. Debido a que as persoas maiores son o principal colectivo que más precisa destes sistemas que facilitan o desenvolvemento da vida cotiá, a concellería que dirixe Tania García Sanmartín difunde a convocatoria dirixida tanto a propietarios individuais como a comunidades de veciños.
27.03.2018.- O programa de subvencións está pensado para favorecer o dereito á accesibilidade universal, no ámbito concreto da accesibilidade arquitectónica. Por iso recolle como actuacións subvencionables a instalación de ascensores, elevadores, salvaescaleiras e demais dispositivos de accesibilidade en edificios de tipoloxía residencial colectiva, dúplex ou vivendas unifamiliares que carezan deles.
As axudas financiarán tamén as actuacións preparatorias previas á presentación da solicitude de axudas, como os gastos derivados da tramitación administrativa, informes técnicos e certificados e honorarios dos profesionais, posto que á hora de realizar a solicitude é preciso presentar como documentación adxunta, por exemplo o proxecto ou memoria da actuación redactados, a licenza municipal de obra, no caso de precisala, ou a comunicación previa ao Concello.
A contía das subvencións será en todos os casos do 60% do gasto subvencionable e cun límites máximo que dependerán da tipoloxía da construción.
As comunidades de propietarios deben presentar a solicitude a través da sede electrónica (sede.xunta.gal). As persoas físicas, ademais, poderán presentalas en formato papel nas oficinas provinciais do IGVS ou a través do portelo único.