VILAGARCIA DE AROUSA

FESTAS
Aberto o prazo de inscrición para participar na Festa dos Maios
A Concellería de Cultura abre este luns, 2 de abril, o prazo para inscribirse na Festa dos Maios a celebrar o vindeiro 1 de maio.As persoas ou colectivos interesados en participar nesta tradicional celebración no que se da a benvida á primavera poderán anotarse nas dependencias da Concellería, sitas no Auditorio, ata o 13 de abril. Os grupos participantes serán agasallados con rosca e cunha compensación económica cuxa suma dependerá do tipo de maio, do número de compoñentes e de si, ademais da composición floral, aportan cantigas que deberán interpretar o día da celebración. As bases pódense consultar no taboleiro de anuncios da web http://www.vilagarcia.gal .

31.03.2018.- O certame de Vilagarcía inclúe as categorías de maio cónico, artístico, cruz de maio, caixas e barcos e poderase participar con ou sen coplillas. Os premios máis elevados correspóndense cos maios máis laboriosos e de maiores dimensións, como son os cónicos e artísticos. En ámbolos dous casos as axudas son de 80 euros para participantes que non acheguen letras. A os grupos que leven coplas daráselles 100 euros se suman un mínimo de 10 integrantes e 200 euros se son grupos de máis de 25 compoñentes.

Para as categorías de maios máis pequenos, como a cruz de maio, caixas e barcos, establécense axudas de 30 e 40 euros para os que participen sen copla e de 50 e 60 euros paras os que si acheguen letra e que deberán contar cun mínimo de 4 membros no grupo.

Poderán participar na Festa persoas a nivel individual ou en grupo, así como colectivos (asociación culturais, veciñais..) e centros educativos. Neste último caso so poderá presentarse un colectivo por colexio, xa sexa ANPA ou dirección. E cada participante só poderá presentar un traballo floral por cada modalidade.

Tradición popular

A Festa dos Maios responde a unha ancestral tradición popular galega para celebrar a chegada da primavera e agradecerlle á natureza os froitos que proporciona. O Concello de Vilagarcía trata de divulgar, promover e conservar esta tradición con fidelidade ás súas orixes, de aí que para manter todos os seus elementos característicos, nas bases do certame inclúense requisitos como que os maios deben realizarse con materiais tradicionais. Do mesmo xeito, tamén se pretende conservar a tradición ligada aos maios de interpretar cantigas de tipo festivo ou satírico. Por iso os grupos que presenten letras deberán interpretalas ante o público durante a celebración da festa.