ECONOMÍA
O Concello adxudica ao Banco Sabadell o préstamo de 1.130.000 euros incluído no orzamento de 2018 O Concello de Vilagarcía adxudicou onte a suscrición do crédito por importe de 1.130.000 euros incluído no presuposto municipal de 2018. A operación bancaria adxudicouse ao Banco Sabadell por ser a súa a oferta máis vantaxosa das cinco entidades que se presentaron ao concurso. A finalidade dos fondos destinarase case na súa totalidade sufragar os investimentos recollidos no plan de investimentos a financiar integramente polo Concello e que se complementarán con outras inversións con cargo ao programa europeo Vilagarcía Avanza e aos fondos provinciais.
17.07.2018.- As condicións do crédito co Sabadell inclúen a amortización nun prazo de 10 anos a un tipo de interese do Euribor trimestral máis o 0,31% e non ten período de carencia, polo que comezará a pagarse de inmediato, unha vez se asine a operación e o Concello dispoña dos fondos. Con esta operación de crédito incluída, o endebedamento do Concello de Vilagarcía para o presente exorcizo de 2018 queda a un nivel moi baixo, do 33,18% segundo indican os informes técnicos que acompañan ao proxecto orzamentario.
Os investimentos que levan maior partida deste préstamo son as obras de accesibilidade (200.000 euros), de saneamento (150.000) e de restauración do patrimonio natural e cultural. Tamén se destinan 115.000 euros ao plan anual de acondicionamento de centros socioculturais e veciñais e 93.000 a actuacións de acondicionamento do medio rural. Outra das partidas máis importantes é a destinada ao pago do xustiprezo dos terreos de Porto Rey na Avenida Rivero de Aguilar (195.000 euros).
Para o subministro de xogos e materiais para o plan anual de parques infantís resérvanse 50.000 euros igual que para a instalación dun sistema de aire acondicionado na segunda planta do consistorio. E 5.000 euros terán como finalidade a adquisición de novas motocicletas para o servizo de notificacións. Para o apartado de Policía Local e seguridade viaria destínanse 39.286 euros, dos que 31.000 permitirán a adquisición de máis chalecos antibalas, mentres que 18.185 serán para a compra de semáforos e sinalización diversa e outros 18.000 para un radar móbil de control de velocidade.
Para actuacións de eficiencia enerxética en instalacións municipais e vías públicas resérvanse 15.943 euros e 6.000 para o subministro de nova iluminación para a explanada do Auditorio municipal. O Conservatorio Municipal de Música disporá de 6.500 euros deste préstamo co obxecto de comprar novo material (3.500 euros) e para a realización de pequenas obras (3.000).
Por último, 9.985 euros do préstamo serán para executar a achega municipal anual do proxecto Agader e 16.380 para o pago da compra ao Estado do anaco de terreo situado baixo o balcón-miradoiro do Balneario da Praia Compostela.