VILAGARCIA DE AROUSA

CONCELLO
O Concello saca a licitación as obras de humanización da rúa Vázquez Leis, en Vilaxoán
O Concello de Vilagarcía acaba de sacar a licitación a obra de Humanización da Rúa Vázquez Leis, en Vilaxoán. Unha actuación que renovará por completo o exterior da principal arteria da localidade baixo criterios estéticos e de accesibilidade, e que conlevará a modernización de todos os servizos básicos. A obra ten un custe de 287.624 euros (IVE) incluído e un prazo de execución de 3 meses. Financiarase cunha subvención de 150.000 euros do POS da Deputación e con cos fondos FEDER, a través do programa "Vilagarcía Avanza" incluído na estratexia DUSI.

01.12.2018.- O proxecto de humanización da rúa Vázquez Leis ten como obxectivo mellorar os servizos, a accesibilidade, a seguridade viaria e a estética da que é a principal arteria de Vilaxoán, a que une a Avenida de Vilanova coa zona do porto. Esta actuación afectará a o tramo da rúa comprendido entre a avenida de Vilanova e a Praza Rafael Pazos.

A idea é deixar toda a rúa a un mesmo nivel, diferenciando a zona peonil da de tránsito de vehículos mediante diferentes pavimentos. Na zona de rodadura usarase formigón branco cepillado, e as beirarrúas cubriranse con lousas de pedra (granito silvestre), similar ás existente na praza.

Suprimiranse todas as barreiras arquitectónicas e acondicionarase a prazoleta intermedia, creando unha pequena zona verde con céspede e arbustos de baixo porte na que se instalarán bancos de formigón con respaldo de madeira.
Como en todas as obras que promove o actual goberno, o proxecto prevé a renovación das redes de saneamento e abastecemento de auga, prestando especial atención á canalización da recollida de pluviais dos edificios, que hoxe desauga directamente sobre a beirarrúa e que, tras as obras, farano directamente á rede soterrada.

Do mesmo xeito, soterraranse as canalización eléctricas, de teléfono e telecomunicacións, e substituirase o actual alumeado público por outro máis eficiente, de tecnoloxía LED e con interruptor astronómico.

DINAMIZACIÓN DE VILAXOÁN

Esta nova obra proxectada polo goberno local de Vilagarcía enmárcase no modelo de cidade no que traballa o executivo de Alberto Varela, baseado en conseguir unha cidade humanizada e accesible, con mellores servizos, onde o peón teña prioridade sobre os coches, e onde a suma destes factores actúe como motor para a dinamización socioeconómica da zona na que se actúa. Dentro desta mesma política, no caso de Vilaxoán, ademais da intervención en Vázquez Leis, inclúese a construción da Escola Infantil Municipal e a proba que se está a levar a cabo para tratar de mellorar a entrada á localidade por beiramar mediante a posible ampliación do paseo marítimo entre Ferrazo e Canelas.