MULLER
A Área de Igualdade organiza un obradoiro de autodefensa para mulleres A Área de Igualdade do Concello de Vilagarcía organiza un obradoiro de autodefensa destinado exclusivamente a mulleres e que ten como obxectivo evitar ou reducir as agresións que sufre a poboación feminina. A actividade ten un novidoso enfoque interdisciplinar, posto que, ademais de técnicas de defensa física, como as artes marciais, abrangue outras procedentes de campos como a Psicoloxía. A asistencia ao obradoiro é de balde e poderán participar nel 30 mulleres a partir de 12 anos de idade. As interesadas deben inscribirse nas dependencias de Muller, no Concello.
13.05.2016.- O obradoiro de autodefensa será impartido por integrantes do colectivo Lésbicas Creando. Desenvolverase o día 31 de maio nas dependencias de Fexdega, en horario de tarde, de 17 a 20:30 horas.
Trátase dun obradoiro con enfoque integral cun método propio no que, a través de diferentes correntes de desenvolvemento persoal e colectivo, como a Psicoloxía, Sexoloxía, Terapia do Reencontro e metodoloxía mixta de diferentes Artes Marciais, como o Karate ou Coshin, poténciase a autodefensa física dende a corporalidade e características das mulleres.
Abordaranse técnicas físicas e elementos emocionais, psicolóxicos e relacionais dende unha perspectiva de crear e ampliar posibilidades fronte ás violencias.