EDUCACIÓN
O Conservatorio abre a matrícula para as probas de acceso a oito especialidades instrumentais do Grao Elemental O Conservatorio Profesional de Música do Concello de Vilagarcía ven de abrir o prazo de matrícula para as probas de acceso ao Grao Elemental de Música durante o curso académico 2020/21. As prazas dispoñibles ascenden a 13 que se reparten en 8 especialidades instrumentais diferentes. As probas de acceso realizaranse no mes de setembro O trámite de matriculación pode realizarse dende hoxe, 25 de xuño, ata o xoves 2 de xullo.
25.06.2020.- As especialidades que se ofertan son: clarinete, guitarra, saxofón, trompa e trompeta (con 1 praza en cada instrumento), violín (2 prazas), frauta (3) e piano (3).
Os candidatos deberán ter entre oito e catorce anos de idade, cumpridos ou a cumprir en 2020. Dende o Conservatorio Municipal infórmase de que, a diferenza do grao Profesional, as probas de acceso ao Elemental non avalían coñecementos, senón aptitudes rítmicas, auditivas, vocais e psicomotrices que os/as candidatos deberán amosar a través de sinxelos exercicios.
Para poder realizar esta proba é necesario cumprimentar un impreso de matrícula e achegar a copia do DNI ou folla do libro de familia ao enderezo de correo electrónico conservatorio@vilagarcia.gal Non se requirirá o pagamento de taxas pola realización da proba de acceso, dada a excepcionalidade da situación actual dada pola pandemia.
Os impresos de matrícula e información precisa sobre as probas están dispoñibles no taboleiro de anuncios do portal municipal http://www.vilagarcia.gal e do enlace https://bit.ly/2AWmqPq Para realizar a matrícula e para calquera outro tipo de consultas deberán dirixirse ao enderezo electrónico conservatorio@vilagarcia.gal