CULTURA
Cultura recibe o libro dos Bolechas co que agasallará aos participantes no Certame Virtual de Máscaras de Entroido A concelleira de Cultura, Sonia Outón, recibiu esta mañá, os 1.000 exemplares do último libro de Os Bolechas, o dedicado ao Entroido de Vilagarcía de Arousa. Este conto será o que reciban como agasallo os nenos e nenas que participen no Certame Virtual de Máscaras que organiza este ano a Concellería para manter o tradicional Carnaval incluso en tempos de pandemia. Para que os interesados dispoñan de máis tempo para confeccionar as súas máscaras de Entroido, o prazo de presentación dos traballos amplíase ata as 12 da noite do domingo, 14 de febreiro. Tamén se organiza unha Choqueirada Virtual aberta a todos os vilagarciáns. Os traballos e disfraces difundirasen polas contas do Concello en Facebook e Instagram durante a semana de Entroido.
09.02.2021.- O Certame Virtual de Máscaras está destinado ás familias que teñan rapazada de 3 a 12 anos. O certame xoga co dobre sentido da palabra máscara en galego, que se refire tanto á típica careta de Entroido, como ás máscaras sanitarias que estamos obrigados a usar debido á pandemia. Por iso, os traballos a realizar polos participantes poderán abordar calquera destas dúas modalidades. O formato é totalmente libre, igual que os materiais a utilizar, co obxectivo de fomentar a creatividade e orixinalidade dos traballos. Unha vez se teñan confeccionadas as máscaras, deberán sacarlle unha foto e remitila, xunto coa solicitude de inscrición debidamente cuberta, ao correo info.cultura@vilagarcia.gal . O formulario de inscrición pode obterse a través do taboleiro de anuncios de http://www.vilagarcia.gal e da sede.vilagarcia.gal
Os participantes poderán pasar polo Auditorio a recoller o seu libro dos Bolechas entre o 18 de febreiro e o 30 de abril en horario de atención ao público, un prazo amplo para garantir que todos teñan tempo para levarse o agasallo e sen que se produzan aglomeracións.
A Concellería de Cultura de Vilagarcía leva xa uns anos tratando de promocionar ao choqueiro, a figura típica e tradicional do Entroido máis popular de Galicia. Este ano tamén o fará, elevándoo ao protagonista de Instagram. Os interesados en participar na Choqueirada Virtual organizada polo Concello terán que disfrazarse nas súas casas e colgar nas súas contas de Instagram unha “historia”incluíndo nela a etiqueta @vilagarciaviva. Poden subir foto, video ou gifs dos choqueiros. Posteriormente o Concello compartirá no seu perfil as historias de choqueiros máis divertidas ou orixinais, tendo sempre presente que so se admiten disfraces de choqueiro. A difusión farase tamén durante a semana de Entroido.