SERVIZOS SOCIAIS
O Concello promove a diversidade cultural celebrando o Día do Pobo Xitano coa comunidade vilagarciá O 8 de abril conmemórase o Día Internacional do Pobo Xitano, unha data que o Concello de Vilagarcía leva celebrando dende o ano 2019 a través do programa de inserción social e de respecto á diversidade cultural que desenvolve a concellería de Servizos Sociais. Neste marco, a Praza de Galicia vestirase de festa o vindeiro luns pola tarde para acoller unha serie de actos que teñen como obxectivo favorecer o espírito de comunidade entre todos os vilagarciáns, acabar con prexuízos e falsos estereotipos e dar a coñecer a riqueza da cultura xitana a través dos vilagarciáns desta etnia.
04.04.2024.- O programa do Día Internacional do Pobo Xitano presentouse este mediodía no Concello cun acto no que participou a concelleira, Tania García, a coordinadora do servizo, Iria Camba, e as dúas educadoras sociais, Laura Caeiro e Bea Lede, responsables do programa de inclusión e mediación intercultural no marco do que se desenvolve esta iniciativa.
Mantendo o título da primeira edición “Xitanos? Si. Vilagarciáns? Tamén”, a celebración comezará ás 18.00 horas cun obradoiro e reparto de pulseiras conmemorativas do 8A elaboradas polos rapaces e rapazas xitanos que participan na iniciativa. Trátase dun grupo duns 30 xóvenes de idades comprendidas entre os 3 e os 18 anos que tamén son os protagonistas do videoclip que se vai estrear durante o acto. As educadoras explicaron que este traballo é especialmente ilusionante para a rapazada xa que, ademais de ser unha iniciativa que saíu deles mesmos, baséase nunha canción que compuxeron para expresar o que senten, o que desexan e o que significa para eles esta conmemoración. A maiores, tamén interpretan o tema, que tiveron a ocasión de gravar no estudio profesional de Vicky Longa, e protagonizan as imaxes do audiovisual rodado e montado por Cristina Durán en Pablo Jueguen en diferentes espazos de Vilagarcía. Algúns destes escenarios foron os institutos Castro Alobre e O Carril, nos que cursan estudos varios dos rapaces e rapazas xitanos.
As educadoras sinalaron que todos eles “están moi contentos e ilusionados por poder ver o resultado do traballo e de poder compartilo con toda a cidadanía de Vilagarcía”.
A celebración do luns completarase coa lectura do manifesto de Día do Pobo Xitano, unha actuación musical e outra de baile, así como con un photocall no que as persoas que acudan á festa poden tomarse fotos e compartilas por redes co hastag #DiaDoPoboXitano para dar maior visibilidade ao evento é a finalidade do mesmo: visibilizar e poñer en valor a riqueza da cultura xitana, promover a igualdade, a integración e o respecto intercultural.
Dende o Concello faise un chamamento a toda a cidadanía do municipio a participar nesta festa para afondar no coñecemento de todos e todas os que vivimos nel e para seguir afianzando o sentimento de comunidade entre todos os vilagarciáns e vilagarciás.
En caso de chuvia, os actos trasladaríanse á Praza da Peixería.
A maiores das actividades a realizar o 8A, as educadoras sociais traballan ao longo de todo o ano coas familias xitanas que o precisan, realizando tarefas de orientación, acompañamento, apoio educativo e clases de reforzo, co obxectivo de motivalos e axudalos a cumprir os seus obxectivos e proxectos vitais e a unha integración real e efectiva.