VILAGARCIA DE AROUSA

EDUCACIÓN
A Escola de Música estrea as reformadas instalacións coa representación do Gato con Botas na nova sala de concertos
A Escola Municipal de Música Bernardo del Río afronta o inminente inicio do curso escolar 2012/13 con moitas novidades e ilusión, despois de rematadas as obras de acondicionamento levadas a cabo durante o verán. Para celebrar a chegada das esperadas reformas e o inicio do curso, a dirección da escola organiza unha actuación na nova sala de concertos creada no edificio do Ramal. Será o xoves 27, a partir das 19:00 horas e, debido a que o aforo da sala limítase a 80 persoas, a actuación será exclusiva para os alumnos de Música e Movemento. O centro abrirase media hora antes para que os educandos e familiares que o desexen poidan visitar as novas dependencias.

A modo de presentación do novo curso, a Escola Municipal de Música porá en escena o conto musicado “O Gato con Botas”. A obra composta e montada polo propio equipo docente do centro Bernardo del Río contará tamén cunha intervención especial, a do policía Benito Romero, que recuperado do accidente sufrido en maio, porá a voz en off ao espectáculo. Deste xeito tan animado, os alumnos máis pequenos do centro, os da especialidade de Música e Movemento e os seus familiares poderán coñecer aos profesores e as novidades previstas para o curso que comezará o vindeiro luns, 1 de outubro.

A presentación para o resto do alumnado do centro terá lugar ao día seguinte, o venres 27, a partir das 19:00 horas e tamén na nova sala de concertos da Escola. Ao igual que na xornada anterior, a dirección aproveitará o acto para explicar as novidades do novo curso, presentar aos docentes e agasallar aos presentes cunha actuación musical.

As clases comezarán a impartirse o luns, 1 de outubro, co horario habitual. Este ano a Escola Municipal de Música conta con 380 alumnos matriculados.

Colaboración institucional e un investimento de 218.493 euros.

As obras de rehabilitación do edificio da Escola de Música foron acometidas a través do convenio de colaboración asinado entre a Deputación Provincial e o Concello. O organismo provincial financiou os 218.493 euros no que se adxudicou a obra coa que se resolveron problemas de filtracións de auga e frío. Entre outras melloras procedeuse á substitución da cuberta, dos teitos e da carpintería exterior, remodeláronse os aseos e cambiouse a distribución das dependencias a efectos de adaptalas ás necesidades do centro de ensino musical e incrementar o seu confort.