OBRAS E SERVIZOS
O goberno convocará aos veciños dos Duráns para informar da instalación da cancha deportiva O goberno local de Vilagarcía convocará a vindeira semana aos representantes das comunidades de veciños dos Duráns para informarlles do proxecto para instalar unha cancha multideportiva na zona. A idea do goberno é que este céntrico barrio conte cun equipamento do que dispoñen xa noutras zonas da cidade e que servirá para favorecer a práctica do deporte e a socialización de nenos, mozos e adultos do vecindario. A cancha ocuparía algo menos dun terzo dos parterres e contaría con dúas canastras e dúas miniporterías.
28.03.2017.- A dotación deste tipo de equipamentos deportivos é unha demanda que teñen realizado veciños de diferentes zonas de Vilagarcía. As últimas atendidas foron as canastras colocadas na urbanización As Gaivotas en Sobrán e as do parque da Alameda de Carril, e está a piques de iniciarse a construción doutra pista deportiva similar na área da Tomada, en Carril.
No caso dos Duráns, onde carecen deste tipo de infraestruturas pese ao crecemento que rexistrou o barrio nos últimos anos e ao incremento de poboación, a pista serviría para complementar a zona de esparexemento que na actualidade conta unicamente cun parque infantil e tres grandes parterres. A cancha non chegaría a ocupar unha desta zonas de prado, polo que aínda quedarían as outras dúas para o libre goce das mesmas. O novo equipamento permitiría dispor dunha zona para que nenos, mozos e mesmo adultos poidan xogar ao baloncesto ou ao fútbol, sen ter que saír do barrio. A cancha contaría cunha malla perimetral para evitar que os balóns escapen cara a estrada ou as casas.
O custe desta actuación ascende a 50.000 euros que se financiarán con cargo ao Plan Concello da Deputación.