CONCELLO
O Concello non autoriza a instalación dun circo na cidade pola utilización de animais no espectáculo O Circo Vienna Roller carece de permiso municipal para instalarse en Vilagarcía de Arousa por tratarse dun espectáculo que fai uso de animais. O Concello denegou o permiso solicitando polo empresario circense en base a un acordo do ano 2015 da Xunta de Goberno Local comprometéndose á defensa dos animais e prohibindo a celebración no municipio de calquera tipo de espectáculo que exhiba ou use animais nos seus números.Tanto o empresario circense como os propietarios dos terreos nos que se está anunciando o espectáculo teñen coñecemento por escrito da resolución municipal.
24.04.2017.- O acordo da Xunta de Goberno de 2015 no que se fundamenta a non autorización do devandito espectáculo que inclúe números con serpes e crocodrilos adoptouse en base á Declaración Universal dos Dereitos dos Animais, así como na Lei 1/1993, de Protección dos Animais de Galicia e está conforme coa liña que está a seguir a Xunta de Galicia que hai unhas semanas aprobou o anteproxecto de lei de defensa dos animais máis restritivo aínda que a actual normativa.
O representante da empresa circense que se dirixiu ao Concello coñece a prohibición que existe en Vilagarcía e que, como toda norma ditada polo Concello, é aplicable a todo o termo municipal, independentemente da titularidade pública ou privada do emprazamento.
En caso de que a empresa persista en instalar o circo, tal como parece que ten anunciado, a Policía Local ten orde de intervir en salvagarda da legalidade vixente, sen prexuízo das posibles sancións que correspondesen.