VILAGARCIA DE AROUSA

CONCELLO
O plan de aforro enerxético esténdese a tres casas de cultura, que este inverno disporán de estufas de biomasa
O plan municipal de aforro e eficiencia enerxética que está desenvolvendo o Concello dende hai uns anos esténdese este outono ás casas de cultura e centros socio culturais municipais. A primeira medida a levar a cabo consistirá na substitución dos calefactores eléctricos que se están usando ata o momento por estufas de biomasa e afectará a tres centros: Fontecarmoa, Galáns e Faxilde. O investimento a realizar nesta actuación ascende a 22.705 euros, para cuxo financiamento o Concello contará cunha axuda no Inega.

22.08.2017.- O Instituto Enerxético de Galicia vén de confirmar a concesión da subvención solicitada polo Concello. A axuda elévase a 8.557 euros, polo que o Concello terá que achegar os 14.148 euros que restan para completar o presuposto.

En total adquiriranse catro estufas de aire biomasa. Dúas delas, de 30 kilowatios, instalaranse nas casa de cultura de Galáns e de Fontecarmoa. As outras dúas, de 16 e 15,2 kilovatios respectivamente serán para o inmoble de Faxilde, de xeito que cada unha delas colocarase dun dos dous andares, permitindo o uso individualizado da mesma en caso de que so se estea utilizando un dos dous pisos.

Confirmada a subvención, o Concello iniciará os trámites para o subministro dos equipamentos que deberían estar instalados antes do mes de outubro.

En anos anteriores, e dentro deste mesmo plan de aforro e eficiencia enerxética, o Concello xa instalou caldeiras de pellets na Escola Municipal de Música e na Bliblioteca. En ámbolos dous casos a medida permitiu prescindir do uso de gasóleo, moito máis caro que o pellets. A dotación de estufas de aire biomasa nestas tres casas de cultura permitirá reducir os custes polo consumo de electricidade, que co uso de calefactores elévase moito dende outono a primavera. Ademais do aforro económico que supón, a calor que ofrece a combustión é máis confortable, situación da que se beneficiarán os usuarios das casas de cultura. A intención do Concello é esperar a ver o resultado que dan estas estufas e coñecer a opinión dos colectivos que os usan porque, de ser favorable, a medida implantarase progresivamente nos demais centros socio culturais municipais.