VILAGARCIA DE AROUSA

SANIDADE
Varela acude ao Parlamento en apoio da retirada do anteproxecto de Reforma da Lei de Saúde
As explicacións dadas polo presidente da Xunta á pregunta formulada voceiro do PSdG no Parlamento Galego sobre o anteproxecto para a Reforma da Lei de Saúde e o novo mapa sanitario que conleva, non convenceron nin ao alcalde de Vilagarcía, Alberto Varela, que esta mañá asistiu á sesión xunto coa concelleira de Sanidade, Tania García, e a presidenta da xunta de persoal do Hospital do Salnés, Rosa Casal. Varela insiste en que a Xunta debe paralizar a tramitación dunha reforma que resultará moi lesiva para todos os galegos, xa que incide nos recortes á sanidade pública, e de xeito concreto para os vilagarciáns e o resto dos veciños da comarca, xa que prevé “converter ao Hospital do Salnés nun mero ambulatorio”.

13.09.2017.- A comitiva vilagarciá acudiu ao parlamento para poñer de manifesto o seu apio á, petición da retirada do anteproxecto que xa conta con máis de 1.500 alegacións, pese a que o decreto publicou sen previo anuncio, en pleno mes de agosto, e con tan só 15 días de prazo para alegar. Varela lamentou que o goberno do PP en Galicia chame optimización de servizos a reducir os servizos sanitarios que existen actualmente no Hospital do Salnés onde desaparece a especialidade de cardioloxía ou a de oncoloxía reducirase un día de atención á semana e con facultativos distintos porque irán saltando dun centro a outro. O alcalde da capital arousá, ao igual que o persoal do centro, advirte que ao perder a entidade de área sanitaria e pasar a converterse en distrito, o Hospital do Salnés será degradado, seguirá perdendo servizos e obrigará aos veciños da comarca a ter que desprazarse a Pontevedra para ser atendido por especialistas pu mesmo para realizar probas que ata agora se estaban facendo aquí. “Esta reforma o único que conseguirá é crear cidadáns de primeira, os que vivan onde se hai un Hospital de referencia, e de segunda, que seremos todos os demais”.

Tras a falta de respostas concretas ás preguntas realizadas por Leiceaga, Varela Paz espera que a o goberno do PP se dea conta da gran equivocación que están a cometer e que, de unha vez por todas, aposten por unha Sanidade Pública de calidade, reforzándoa non seguindo cos recortes, porque é o que lle estamos pedindo todos os galegos”. De non deter a tramitación desta reforma e non tratar de consensuala antes cos grupos da oposición, os profesionais e representantes das plataformas en defensa da sanidade, o alcalde advirte que “o goberno do PP na Xunta vaise a atopar cunha forte contestación social e mobilizacións como xa lle aconteceu coa Lei de Acuicultura”.