|
Un ano máis, a Concellería de Xuventude programa “Música na Rúa”, co obxectivo de dar a coñecer os novos grupos da cidade. Nesta ocasión haberá dúas sesións, as dúas no parque da Xunqueira, ás 23 horas, os días 1 e 2 de setembro. O día 1 actuarán Cornelius, Vado Permanente e Tenderete. O día 2, Salida de Emergencia, Pares y Nores, e Thoissane Percussion. En caso de choiva, a actuación trasladaríase para a Praza de Peixería. SALIDA DE EMERGENCIA é un grupo nado na parroquia de Cornazo, onde residen os fundadores do conxunto, Patty, vocalista, e Jose, guitarra. Este proxecto xurdiu duna antiga formación creada no Val de Arán, en Lleida, en 1998, de onde saliu a súa primeira demo, “Al otro lado del túnel”, que foi gravada en Barcelona. Definen a súa música como “rock contundente”, o que se pode comprobar na súa web: http://www.salidadeemergencia-sde.tk . PARES Y NORES é unha banda multitudinaria, na que cada quen aporta o seu propio estilo, a súa habilidade con algún instrumento e as súas influencias musicais. O resultado é unha formación heteroxénea, na que o fundamental é pasalo ben. THIOSSANE PERCUSSION é sen dúbida a aposta máis orixinal. Trátase dun grupo formado por tres músicos senegaleses e tres galegos, que interpretan percusión africana, con bailes e cantos. Esta será a presentación do conxunto en Vilagarcía, cidade na que reside un dos seus integrantes.