|
Lizgairo está composto por tres músicos doutros tantos grupos senlleiros do folk galego: Anxo Pintos, de Berrogüetto, Rodrigo Romaní, de Milladoiro, e Xosé Liz, de Beladona. Lizgairo representa un xeito orixinal e creativo de enfrontar a recreación contemporánea da música instrumental de tradición oral dende unha perspectiva acústica que emprega recursos harmónicos e melódicos non usuais neste xénero. A tímbrica do trío ven caracterizada polo uso de instrumentos que se complementan e distinguen polo modo peculiar de adaptalos aos ritmos da música tradicional. A súa calidade profesional vese refrendada no prestixio que aporta cada un dos seus compoñentes, nomes de longa traxectoria no mundo do folk.