 Observaciones |
|
|
Dende o 22 de outubro ate o 27 de novembro, a Sala de Exposicións Antón Rivas Briones acollerá as exposicións “Memoria”, de Saúl Otero, e “Relatos íntimos” de Xandre Otero. Pai e fillo levan anos traballando en paralelo, cada un seguindo a súa particular traxectoria, pero unidos nunha mesma vocación pictórica que lles leva a compartir esta mostra.
O público terá unha ocasión senlleira para ver e disfrutar da produción última de dous interesantes creadores cunha probada traxectoria ás costas.
A inauguración da exposición terá lugar o venres 22 de outubro ás 20.00 horas.
“Memoria”
Nos cadros de grande formato de Saúl Otero, están presentes a pulsión e o irrenunciable afán de denuncia, a fervenza creadora e a pegada de certas obsesións, a entrega ao ideal da liberdade e o desexo de non confiarse a ningún marco preestablecido. Os seus cadros rómpense especialmente e acollen unha potente harmonía visual de cores, liñas, textos, obxectos e engrenaxes diversas. Como contrapunto lúdico ás súas tonalidades máis comprometidas, tamén ofrece unha serie de pezas pequenas de xilocromía e metal xogando coas formas, volumes e asociacións.
“Relatos íntimos”
Con “Relatos íntimos” Xandre Otero ofrece ó visitante visións e recordos, o humano e o animal, o natural e o manufacturado. Amosa nas súas obras unha estampa orgánica de paisaxes e primeiros planos. De elementos extirpados e posteriormente recontextualizados. Unha serie de paisaxes que mostran un aparente azar que se contrapón ó desorde humano, pero que en ambos convirte os trazos máis rudos en tons amables, despigmentando a agresividade e trasformando os campos abertos en meros contidos dentro dos artefactos. Unha e outra vez este artista transforma a realidade e a consistencia das cores. |
