VILAGARCIA DE AROUSA

DEPORTE
A inscrición no Campionato Galego de Media Maratón de Vilagarcía supera xa os 400 participantes
As rúas da cidade volverán a acoller o domingo 26 de novembro a Media Maratón Concello de Vilagarcía. A proba, que non se celebrada dende o 2019, xusto antes da pandemia, regresa á capital arousá e faino ao grande xa que será tamén Campionato Galego de Media Maratón. Ademais, a unha semana de pecharse o prazo de inscrición, xa se superan os 400 participantes entre as modalidades amateur e profesional.

14.11.2023.- A Media Maratón presentouse esta tarde no Concello coa presenza do alcalde, Alberto Varela, o concelleiro de Deportes, Carlos Coira, e o presidente da Federación Galega de Atletismo, Iván Sanmartín. O responsable federativo e ex corredor profesional comentou que ten participado en varias medias maratóns de Vilagarcía -a última no 2009 coincidindo tamén co Campionato Galego daquel ano-, destacando que se trata dun circuíto “moi atractivo para os deportistas, porque como é totalmente chairo, permite cubrilo rápido”, algo que os corredores profesionais teñen moi en conta xa que ao tratarse dun campionato autonómico as marcas pasan ao ránking nacional.

Sanmartín agradeceu ao Concello de Vilagarcía e a súa Fundación de Deportes a organización da proba que se celebrará coa normativa e baixo o control técnico do Comité de Xuíces da Federación Galega de Atletismo.

O presidente do organismo federativo indicou que á cita de Vilagarcía acudirán corredores de todas partes de Galicia e amosouse optimista respecto á posibilidade de superar incluso os 500 dorsais entre as dúas modalidades.

Con saída ás 10 da mañá da Praza da II República, a carreira discorrerá por un circuíto completamente urbano con extremos a media altura da avenida Rosalía de Castro cara o norte e dando á volta no Parque Dona Concha, en Vilaxoán, cara o sur. O circuíto inclúe unha volta inicial pequena, bordeando o parque Miguel Hernández, e dúas completas entre os extremos mencionados.

O presidente explicou que o luns 20 ás 20.00 horas péchase o prazo de inscrición para o Campionato Galego, trámite que os clubs deben realizar a través dunha plataforma específica para os deportistas federados. A inscrición na modalidade para afeccionados permanecerá aberta dous días máis, dándose por concluída ás 23.59 horas do día 22 de novembro. Neste caso, o trámite faise a través da plataforma pública carreirasgalegas.org e o prezo é de 15 euros ata o día 19, e de 20 euros as tres últimas xornadas. Os deportistas con licenza federativa non teñen que pagar a cota.

A proba dispútase en sete categorías: sub 20 (para nados nos anos 2004 e 2005), sub 23 (nados en 2001, 2002 e 2003), sénior (ata 34 anos), máster 1 (de 35 a 39 anos), máster 2 (de 40 a 49), máster 3 (de 50 a 59) e máster 4 (de 60 anos en diante).

O alcalde de Vilagarcía congratulouse de recuperar para o calendario de eventos deportivos esta Media Maratón. Verela destacou o efecto dinamizador e de atracción de xente que teñen as competicións, citando os numerosos eventos celebrados en novembro. “A maiores dos 500 corredores que poden vir á Media Maratón, temos que sumar os 400 deportistas que participaron a pasada fin de semana no Open de Xadrez e os 1.090 do Campeonato de España de Kenpo, a maioría dos cales veñen acompañados de familiares”.

Tanto o rexedor como o presidente da Federación animaron a participar na Media Maratón, “de forma activa si se conta coa preparación física axeitada, ou como público para gozar do espectáculo e para animar e premiar o esforzo dos participantes na carreira”.