CULTURA
A celebración das Letras Galegas péchase coa proxección de “Matria” e coa xornada festiva do venres en Carril A programación deseñada pola Concellería de Cultura con motivo do Día das Letras Galegas, concentra os seus actos principais entre as xornadas de mañá e do venres. Unha homenaxe dos escolares da cidade a Luísa Villalta Gómez -a autora á que se recoñece este ano- e a proxección da película "Matria” compoñen a oferta do xoves; mentres que a tradicional xornada festiva en Carril, con música, baile e a ofrenda floral ante o busto de Rosalía de Castro, completan a axenda do propio 17 de maio.
15.05.2024.- O Auditorio encherase mañá a partir das 11 horas cos escolares de varios centros educativos do municipio que se unen para render as súas particulares homenaxes a Luísa Villalta. Con recitais poéticos, música, teatro e artes plásticas, o alumnado porá en relevo a obra e a vida desta polifacética creadora, filóloga, tradutora e violinista que escribiu poesía, teatro, narrativa de ficción, ensaio e artigo.
Os amantes do cine, e en particular, das producións galegas, terán ese meso día a oportunidade de ver unha das películas máis premiadas o ano pasado. Trátase de “Matria”, o film que Álvaro Gago rodou en terras arousás e que protagonizan María Vázquez, Santi Prego, Soraya Luaces e Tatán. A proxección organizada pola Concellería de Cultura coa colaboración do Cine Club Ádega comeza ás 20.30 horas e a entrada é libre e de balde ata completar aforo. Ao remate da proxección haberá un coloquio sobre a película.
Como vén sendo habitual dende hai anos, o 17 de Maio, o propio Día das Letras Galegas, o programa terá centralizarase en Carril. Alí, durante toda a mañá realizaranse diferentes actos que comezarán ás 11 horas cun pasarrúas e continuarán ás 12 co baile tradicional da Escola Gato Negro e Malveiras. Ás 12.30 realizarase a ofrenda floral a Rosalía de Castro e os actos pecharanse de forma máis lúdica co concerto que, a partir das 13.00 horas, ofrecerá Xosé Duarte na Praza da Liberdade.