OBRAS E SERVIZOS
A mellora do camiño da rúa Canto, en Sobrán, sae a licitación cun investimento de 80.000 euros O plan de mellora e mantemento da rede viaria municipal de Vilagarcía continuará cunha nova actuación na parroquia de Sobrán. Trátase do acondicionamento do camiño da rúa Canto, obra que o Concello vén de sacar a licitación cun orzamento de 79.863 euros (impostos incluídos), que se cofinancian cunha achega da Axencia Galega de Desenvolvemento Rural (Agader). A obra ten un prazo de execución de tres meses e as empresas interesadas dispoñen ata o 17 de xuño para presentar as súas ofertas.
27.05.2024.- O camiño sobre o que se vai actuar atópase actualmente bastante deteriorado debido ao desgaste polo intenso tráfico que soporta, destacando a presenza de fendas e de fochancas que dificultan o tránsito e representan un risco para a circulación. Para resolver estas deficiencias e atender ás necesidades da veciñanza da zona, o Concello programou a obra que, ademais de renovar por completo a capa de rodadura, incluirá outras melloras, como o acondicionamento da rede de drenaxe ou a construción de lombos redutores de velocidade.
Para que o firme quede nas mellores condicións, fresarase a capa de rodadura actual para, a continuación, botar unha nova de 6 centímetros de grosor. Ademais, a renovación do tramo da rede de drenaxe incluirá o correspondente levantamento e reposición das tapas das arquetas.
Actualmente o camiño presenta un ancho variable coa alternancia de estreitos tramos de 4 metros con outros que chegan ata os 10, o que, ademais de dificultar a circulación, supón un risco tanto para os vehículos como para os peóns. Pos iso, para mellorar a seguridade viaria, os traballos aproveitaranse para ensanchar a vía nas zonas onde sexa posible, de xeito que o ancho medio do camiño pase a contar con 7,1 metros.
40 camiños mellorados
A rúa Canto súmase con esta obra á longa lista de camiños rurais que se teñen ido mellorando nos últimos tempos en diferentes parroquias do municipio, como a rúa do Souto, en Cornazo, o Camiño Novo de Zamar, as rúas Ardinso e García Hermo en Gillán, ou rúa Xiabre, por citar só as m. En total, as vías acondicionadas ascenden a 40.