TRÁFICO
Rodrigo de Mendoza recupera o dobre sentido da circulación en toda a avenida A circulación rodada en Rodrigo de Mendoza volverá á normalidade a partir de mañá coa reapertura do carril pechado no último tramo da avenida por motivo das obras de saneamento que está a executar Augas de Galicia. Será a última hora da mañá cando esta arteria do tráfico recupere os dous carrís da circulación de forma definitiva. Os traballos continuarán a próxima semana no tramo da vía que discorre entre Fexdega e a finca Douro, pero non afectarán á circulación de vehículos. Simplemente será necesario suprimir temporalmente a liña de aparcamentos, que é por onde se instalará a nova canalización.
30.05.2024.- As melloras no saneamento continúan tamén polo fronte de Valle-Inclán, onde un sentido da circulación está regulado con semáforos dende principios desta semana. Segundo comunicaron dende a adxudicataria, a situación nesta zona complicouse algo máis do esperado debido ao elevado número de servizos que discorren polo subsolo e ao enmarañadas que se atopan as canalizacións, o que obriga a ir máis lento para non romper ningunha instalación.
Por outra banda, responsables da adxudicataria explicaron que o parque infantil da Xunqueira poderá estar reposto e aberto ao público coincidindo co inicio das vacacións escolares. A empresa xa contratou os elementos a instalar –haberá dous xogos novos- e están a espera de que lle sexan subministrados para rematar a actuación na zona infantil.