SANIDADE
Escolares do Salnés analizan a influenza da publicidade no consumo de bebidas enerxéticas entre a poboación xuvenil Preto de cincocentos escolares de 6º curso de Primaria de colexios de Vilagarcía, Cambados e Meis participaron nun obradoiro organizado pola Área de Prevención do SPAD de Vilagarcía co obxectivo de fomentar o espírito crítico entre a poboación infantil e xuvenil de cara a previr adicións ou hábitos de consumo pouco saudables. Nesta actividade en concreto analizaron a influenza da publicidade no consumo de bebidas enerxéticas entre a xuventude. Os talleres realizáronse durante os meses de marzo, abril y maio.
04.06.2024.- O obradoiro parte do feito de que a poboación infanto-xuvenil é a máis vulnerable á influencia que a industria das marcas e a publicidade exerce sobre eles e elas e, en consecuencia, na súa autoestima; razón pola cal a rapazada debe ser crítica sobre as súas condutas e pensamentos con respecto a estas modas.
Coas actividades realizadas e dirixidas por unha psicóloga, os alumnos e alumnas debateron e reflexionaron sobre a influencia da publicidade nos seus gustos, hábitos e sentimentos. Tamén traballaron de forma práctica estas reflexións elaborando anuncios comerciais e campañas sociais sobre as bebidas enerxéticas.
A elección deste produto para tratar no taller baséase en datos empíricos que apuntan que en 2023 o consumo de bebidas enerxéticas nos últimos 30 días por parte da poboación xuvenil (de14 a 18 anos) incrementouse en 4 puntos respecto aos datos de 2021. Ademais, en España a prevalencia é maior entre os homes (54.4%) que entre as mulleres destas idades (40,7%).
O aumento no consumo destes produtos explícase en gran parte pola influenza das intensas campañas publicitarias, que as definen como bebidas refrescantes para incrementar a resistencia física, proporcionar sensación de benestar e estimular o metabolismo, e capaces de subministrar un elevado nivel de enerxía. Esta descrición é a causa de que a xuventude se sinta atraída por elas, sen ter en conta e descoñecer que estas supostas calidades proceden dunha combinación de ingredientes adicionados polos seus efectos estimulantes, o que ocasiona graves danos para a saúde nos menores en idade de desenvolvemento.