CONCELLO
O Concello esixe á Xunta que licite xa a construción do novo centro de saúde “Vilagarcía leva décadas demandando un novo centro de saúde e non imos permitir que se nos siga negando ou demorando innecesariamente unha infraestrutura tan necesaria e urxente como esta”, sinala o goberno local. Por esta razón, o Concello de Vilagarcía esixe á Xunta de Galicia que licite xa a construción do centro sanitario. Dende Ravella apúntase que non hai ningún trámite pendente que impida ao executivo de Alfonso Rueda iniciar o procedemento de contratación, e lémbrase que o propio PP autonómico anunciou en plena campaña electoral que a obra sairía a licitación no mes de febreiro, “compromiso que non cumpriron e que, case catro meses despois, continúan sen cumprir”.
04.06.2024.- Ante esta reiterada desidia do goberno autonómico para coas demandas de Vilagarcía, dende Ravella arguméntase que o Concello cumprimentou todos os trámites previstos no protocolo asinado no seu día co Sergas e a Autoridade Portuaria, e que xa puxo os terreos da antiga Comandancia a disposición da Consellería hai meses, polo que só queda que esta proceda a adxudicar as obras.
Dende a capital arousá non se entende que tendo o proxecto rematado dende hai case un ano, os terreos dispoñibles e o financiamento resolto grazas aos fondos da Unión Europea, a Xunta de Galicia siga demorando unha obra tan necesaria e pola que a cidade leva décadas esperando. “A única explicación é que se estea retrasando deliberadamente para continuar castigando a Vilagarcía por motivos políticos”. O executivo de Varela advirte que non van consentir máis demoras e que, ademais, os fondos europeos teñen un prazo de execución de obrigado cumprimento.