EDUCACIÓN
A Escola de Música encara o vindeiro curso cunha matriculación en torno aos 400 educandos A expensas do resultado da convocatoria de setembro, a Escola Municipal de Música de Vilagarcía encara o curso 2024/25 cunha matriculación en torno aos 400 educandos (391 inscritos en xuño). Pechado o primeiro prazo de matriculación, o centro Bernardo del Río desenvolverá nos vindeiros días os festivais cos que celebra o fin da actual tempada lectiva.
06.06.2024.- A semana do 10 ao 14 de xuño estará dedicada ás actuacións do alumnado de Música e Movemento, os de 3 a 6 anos. Os festivais terán lugar na sala de concertos da escola con entrada libre ata completar o aforo.
O luns 17 de xuño celebrarase o concerto de solistas e o martes 18 está programado o de agrupacións, no que participa o alumnado do último curso de Música e Movemento, que nese mesmo acto recibirá o diploma de fin ciclo. Ámbolos dous concertos terán lugar na sala principal do Auditorio Municipal a partir das 19:30 horas e serán de entrada libre ata completar capacidade.
Ademais, a Escola Municipal de Música volverá a participar este ano no Festival Internacional de Música Clásica de Vilagarcía, o Clasclás, dentro do programa Clasclás a pé de rúa. Os alumnos do centro, xunto cos do Conservatorio, ofrecerán concertos en diferentes espazos da cidade os días 21 e 22 de xuño, para o cal interpretarán unha variada selección de obras dos seus respectivos repertorios.