VILAGARCIA DE AROUSA

OBRAS E SERVIZOS
Entra en servizo o novo ascensor do paso da Escardia, máis seguro e con capacidade para 12 persoas
Os veciños da zona da Escardia xa poden volver a utilizar o ascensor do paso soterrado baixo a vía do tren. O novo elevador instalado polo Concello está operativo dende hoxe, como puideron comprobar o concelleiro de Obras e Servizos, Lino Mouriño, a tenente de alcalde, Tania García, e a edil de Facenda, Luz Abalo. O equipamento, no que o Concello investiu 48.000 euros, ten maior capacidade que o anterior, ata 12 persoas, é máis seguro e eficiente enerxeticamente, e acondicionouse debidamente para evitar as filtracións de auga que provocaban boa parte das avarías.

13.06.2023.- Os técnicos da empresa Schindler, adxudicataria da obra, explicaron as características técnicas do novo elevador, que conta con equipos de última tecnoloxía que, ademais de proporcionar mellor rendemento e de aportar maior comodidade e seguridade aos usuarios, tamén son máis resistentes e consumen menos enerxía.

Entre as melloras que inclúe o novo equipamento está un sistema de seguridade que, en caso de parada ou de corte do subministro eléctrico, mantén sempre unha reserva de enerxía suficiente para levar o ascensor ata o nivel máis próximo e abrir as portas, de xeito que a xente non quede atrapada no seu interior ata que se arranxe a avaría ou volva a electricidade. O elevador está videoconectado coa operadora e dispón de botón de chamada e alarma para casos de emerxencia.

Os traballos incluíron o illamento, impermeabilización e saneamento das paredes interiores e do foso, e tamén a colocación dunha viseira na saída ao exterior, na parte superior do elevador, para protexer a instalación da auga da chuvia. Ademais, os materiais utilizados na construción do equipamento son altamente resistentes á intemperie e tamén aos actos vandálicos.

Lino Mouriño lembrou que esta mellora na accesibilidade para os veciños da zona da Escardia, Guillán e A Torre puido executarse grazas aos remanentes dos orzamentos municipais e lamentou que o principal partido da oposición non apoiase o reparto destes fondos no Pleno, “tratando de obstaculizar actuacións necesarias e demandadas pola veciñanza, como é o caso”. O concelleiro criticou a dobre vara de medir do PP “que primeiro demanda obras e logo, cando hai que aprobar o financiamento para facelas, non as apoia para poder seguir criticando ao goberno en lugar de buscar solucións para os veciños”.