CONCELLO
O goberno local abre co BNG as negociacións sobre o Orzamento Municipal O goberno local de Vilagarcía abriu esta mañá as negociacións sobre o Orzamento Municipal para 2024 cunha reunión co BNG co obxectivo de estudar as propostas presentadas polo grupo nacionalista. No encontro participaron o alcalde, Alberto Varela, e a concelleira de Facenda, Luz Abalo, por parte do executivo socialista, e os dous concelleiros do BNG, Xabier Rodríguez e Rosa Abuín.
21.06.2024.- Os edís do BNG puideron expoñer as liñas argumentais da proposta no seu conxunto e explicar polo miúdo as máis importantes, comprometéndose o goberno local a estudar o seu posible encaixe na liña de acción do executivo e a dispoñibilidade orzamentaria, decisións que darán a coñecer no transcurso doutra xuntanza. O encontro celebrouse nun clima de total cordialidade e poñendo de manifesto ambas partes a respectiva disposición para chegar a un acordo beneficioso para Vilagarcía.
En paralelo, o goberno local anunciou que a vindeira semana convocará ao resto dos grupos da oposición para abordar o Orzamento e saber si teñen algunha proposta que trasladar.