VILAGARCIA DE AROUSA

SANIDADE
Concello de Vilagarcía súmanse á campaña da AGL para dar a coñecer a enfermidade do lipedema
O Concello de Vilagarcía sumouse á campaña que a Asociación Galega de Linfedema vai desenvolver nas vindeiras semanas en Vilagarcía co obxectivo de informar á poboación dobre o lipedema, unha afección bastante descoñecida, infradiagnosticada, que afecta principalmente a mulleres e que pode resultar inhabilitante. Baixo o título “Que nada nos pare” a AGL inaugurou este mediodía unha exposición informativa na Praza de Galicia, acto ao que asistiu o alcalde Vilagarcía, Alberto Varela, xunto cos representantes da organización e de Zona Aberta, entidade que tamén colabora.

24.06.2024.- A mostra é a primeira das iniciativas que a AGL desenvolverá nas vindeiras semanas en Vilagarcía para dar a coñecer esta patoloxía, recoñecida pola OMS dende 2018, consistente nunha alteración non inflamatoria da graxa subcutánea que se concentra nas extremidades das persoas (pernas e brazos).
Trátase dunha enfermidade crónica e dexenerativa, de orixe xenética e con compoñente hormonal. Adoita confundirse co linfedema, celulite ou obesidade porque os seus principais síntomas son a desproporción en brazos e pernas en comparación co resto do corpo. Actualmente, o lipedema carece de cura.

As persoas que teñen lipedema conviven con dores constantes e incapacitantes, teñen pesadez, hematomas frecuentes e problemas circulatorios, estreitamento de capilares e dano linfático. En casos avanzados, afecta gravemente á mobilidade impedindo que a persoa poida camiñar e valerse por si mesma.

Ademais, non responde a dietas convencionais nin exercicio intenso.
Ao ser unha patoloxía invisible para o sistema de saúde, é moi difícil contar cun diagnóstico médico e, ao carecer dun tratamento conservador, pode empeorar dando lugar a problemas non só físicos senón tamén psicolóxicos así como trastornos da conduta alimentaria.

Ademais das propias dificultades que teñen as persoas diagnosticadas con lipedema, a maioría recoñece que atopa barreiras a nivel social, como poder atopar roupa adecuada e o feito de socializar con outras persoas. Isto significa vivir cunha carga emocional, de incomprensión e rexeitamento social por ter unha imaxe que non se corresponde cos estereotipos da sociedade actual.

Esta patoloxía afecta a preto dun 20% da poboación feminina mundial, tendo unha repercusión de menor medida a homes. Estímase que a nivel mundial, 616.000.000 de persoas viven con esta enfermidade completamente descoñecida, non rara, pero si infradiagnosticada e infratratada pola Sanidade Pública.

A maiores da mostra que permanecerá na Praza de Galicia ata o día 30 de xuño, as accións para sensibilizar á poboación sobre o lipedema continuarán coa colaboración do comercio local. Que fará visible a enfermidade nos seus escaparates expoñendo manequíns co tratamento de lipedema. Participan na iniciativa os establecementos Nieves Álvarez, Moto Bazar, calzados e complementos Yosu, Los Pepes, Iratis Moda, María Costureiro, Cocoe Moda e + Sport.

A campaña en Vilagarcía completarase o 29 de xuño, xornada na que a AGL porá unha mesa informativa na Praza de Galicia de 11 a 13.30 horas e tamén día no que os locais de hostalaría de Zona Aberta recadarán fondos para AGL a través de diferentes huchas colocadas nos seus locais.

A maiores, a AGL puxo en marcha un ha recollida de firmas a través da plataforma Change.org para demandar que o lipedema se trate na sanidade pública e as prendas de compresión sexan incluídas no Catálogo Ortoprotésico nacional. A campaña leva por título ¡Reconocimiento del lipedema como enfermedad en la sanidad pública YA! E pode accederse a ela a través do enlace:
https://www.change.org/p/reconocimiento-del-lipedema-como-enfermedad-en-la-sanidad-p%C3%BAblica-ya