FORMACIÓN
O alumnado do programa de emprego Labora Xove recibe formación en emprendemento nas novas instalacións da Cámara de Comercio Dentro da serie de saídas que adoita facer como complemento a súa formación, o alumnado do Programa de Emprego Labora Xove 2023 visitou o venres pasado as novas instalacións da Cámara de Comercio de Vilagarcía de Arousa, onde recibiu formación sobre o proceso de emprendemento. O persoal da Cámara expuxo, durante case dúas horas, os principais aspectos a ter en conta como emprendedores: a idea, a planificación e a busca de financiación, foron as claves da charla formativa, na que o alumnado participou expoñendo os plans de empresa que elaboraron previamente.
1.7.2024. Esta charla sobre emprendemento vén a completar a formación en Creación de Empresas que se está a impartir no Programa de Emprego, e que ten o obxectivo de ampliar as opcións de inserción laboral do alumnado unha vez remate a súa participación no mesmo. O Programa de Emprego Labora Xove, promovido polo Concello de Vilagarcía de Arousa, enmárcase nas estratexias de emprego para persoas mozas do Sistema Nacional de Garantía Xuvenil, e está financiando con Fondos Europeos nun 60% a través do Programa FSE+ Galicia 2021-2027.