MEDIO AMBIENTE
As estacións de carga de vehículos eléctricos nos mercados rexistraron máis dun centenar de usuarios no primeiro mes As estacións de carga de vehículos eléctricos promovidas polo Concello dentro da súa estratexia de mellora dos mercados tradicionais acaban de cumprir o seu primeiro mes de funcionamento. Neste tempo, as dúas estacións -unha xunto á praza da Verdura en Vilagarcía e outra no parque de dona Concha, xunto ao mercado de Vilaxoán- rexistraron algo máis dun centenar de cargas, cunha clara diferencia entre unha e outra: se na Verdura houbo 86 usuarios, na de Vilaxoán tan só 27. Aínda así, o concello considera positivo ambos datos, tendo en conta que a iniciativa acaba de arrancar e que, polo de agora, aínda son poucos os usuarios de vehículos eléctricos.
04.04.2024. Precisamente para promover ese uso, durante os primeiros meses e probablemente en todo o que queda de ano, as estacións serán gratuítas, de xeito que calquera condutor poderá enchufar o seu vehículo sen que estea necesariamente vinculado a ningunha actividade relacionada coa praza nin que teña que aboar nada, sexa cal sexa o volume de carga; o único que terá que facer é darse de alta nunha app. No primeiro mes, os días de máis uso foron os luns e os venres; os que menos, os martes, que é cando se celebra o mercado.
Polo de agora, as estacións funcionan conectadas á rede xeral eléctrica, pero é unha medida provisional. A intención é que en pouco tempo se alimenten con placas fotovoltaicas. No caso da Verdura xa están instaladas e pendentes de que Naturgy autorice a súa conexión. No de Vilaxoán, está aprobado o proxecto das placas e en poucos meses a estación seguirá o modelo de Vilagarcía.
Tanto as estacións de carga como as instalacións das placas solares se enmarcan no obxectivo xeral do goberno municipal, esixido pola propia Unión Europea (cuxos fondos financian ambos proxectos), de favorecer unha economía baixa en carbono, reducindo a contaminación e coidando o medioambiente. En definitiva, de lograr unha cidade máis saudable e sostible.