VILAGARCIA DE AROUSA

FESTAS
Os xigantes e cabezudos de Carril estrean vestiario e engaden dúas incorporacións ao equipo
Ante un bo número de veciños e coa representación das forzas vivas da localidade, a Praza da Liberdade acolleu este mediodía a presentación da nova e flamante escuadra de xigantes e cabezudos de Carril. Tras unha acción promovida polas comisións de festas de Santiago Apóstolo e San Fidel, e coa colaboración de institucións públicas e entidades privadas, os cabezudos puideron estrear vestiario e incorporar dúas novas figuras: a do cura Manuel Cotelo, e a da Bígara, unha nena con síndrome de Down que actualiza a tradición popular aportando diversidade e dando exemplo de integración das persoas con necesidades especiais.

17.07.2024.- O Concello de Vilagarcía, a través da súa Concellería de Cultura, contribuíu nesta acción financiando a renovación da roupa dos cabezudos do garda municipal ou Enaniño das Uvas e da súa muller Maruxa, dentro das accións de apoio á cultura e ás tradicións populares do municipio. A Confraría de Pescadores, a empresa Calefacciones Villar, a familia Sánchez-Alonso, Tati e Juan Carlos Platis foron outros dos colaboradores.

O alcalde, Alberto Varela, agradeceu a todos eles o interese demostrado por manter viva esta antiga tradición que forma parte da cultura popular e das festas de Carril, así como por modernizala incluíndo personaxes que reflicten a sociedade actual e diversa na que vivimos e dean exemplo de valores como a integración, “especialmente as das persoas que teñen necesidades especiais, pero tamén capacidade excepcionais”, comentou dirixíndose a Ainoa, unha nena con síndrome de Down, e aos seus pais, José María Sánchez Búa e Luz Alonso, que foron os que encargaron a Juan Carlos Platis a confección do cabezudo da Bígara e o doaron ao pobo.

Tamén recibiu os parabéns dos organizadores, Tati, artífice da recuperación da figura do cura Manuel Cotelos, e todos os presentes se sumaron ao recoñecemento xeral a Manuel Bóveda “Papito” ao que a Confraría de Pescadores agasallou cunha dorna de cerámica. O pai de Bóveda foi quen creou os xigantes e cabezudos orixinais sendo el neno. E o propio Papito, décadas despois, encargouse de facer o de Maruxa, así como de conservar todos os bonecos ao longo do tempo, contribuíndo a manter viva a tradición dos xigantes e cabezudos de Carril, sempre presentes nas súas festas.

Como colofón ao acto festivo desta mañá, os oito xigantes e cabezudos botaron un baile na Praza da Liberdade lucindo as súas mellores galas.