MEDIO AMBIENTE
O Concello contratará a cinco traballadores para formar a brigada contra incendios forestais Vilagarcía volverá a contar este verán cunha brigada de prevención de incendios forestais a través do convenio de colaboración asinado entre o Concello e a Consellería de Medio Rural. A brigada estará composta por cinco traballadores, que serán contratados durante tres meses para desenvolver as tarefas de prevención e extinción lumes nos montes do municipio. A selección do persoal levarase a cabo o día 24 de xullo no Auditorio Municipal.
20.07.2024.- Os postos convocados polo Concello correspóndense con un xefe/a de brigada (grupo C1), un condutor/a (AP) e tres peóns (AP). Os requisitos que deben cumprir os aspirantes están recollidos nas bases da convocatoria, onde tamén figuran o tipo de probas ás que deberán someterse na selección, que se fará mediante o procedemento de concurso-oposición libre, valorándose tanto os méritos como o resultado das probas a realizar. As bases pódense consultar no taboleiro de anuncios do Concello, no da web http://www.vilagarcia.gal e na sede electrónica (sede.vilagarcia.gal) no apartado de Recursos Humanos e, dentro deste, no de Procesos Selectivos.
As persoas interesadas en participar na convocatoria deben presentarse o día 24 de xullo no Auditorio (na avenida da Mariña) ás 9.00 da mañá levando o DNI e un currículo vitae debidamente xustificado con documentos orixinais. Tamén deberán levar roupa deportiva apta para realizar as probas físicas.